Održan pomen prvom mitropolitu obnovljene Crnogorske pravoslavne crkve, Gospodinu, Antoniju (Abramoviću)

Njegovo Blaženstvo, Arhiepiskop Cetinjski i Mitropolit Crnogorski, Gospodin Mihailo sa sveštenstvom, 19. 11. 2023. godine sa početkom u 10 sati, na  cetinjskom Novom groblju, održao je pomen obnovitelju Crnogorske Pravoslavne Crkve, Njegovom Blaženstvu  Mitropolitu Antoniju (Abramoviću).

Nakon pomena, protođakon Sreten Vujović održao je prigodan govor, čiju sadržinu prenosimo integralno:

Vaše Blaženstvo,

Mitropolite Mihailo,

dragi prijatelji,

Opet smo tu, kod Vječne kuće, Blaženopočivšeg Mitropolita Antonija, prvog Vladike obnovljene Crnogorske pravoslavne crkve. Tu smo da se priśetimo datog zavjeta u teškim momentima i za našu državu i za Crkvu, kada se kidiše na sve crnogorsko!  A zar je ikada bilo lakše? Opet su tu „lažni proroci“, koju unose zavadu među braću, većina  njih zbog neznanja, pa se uvijek iznova pitamo: Ako i mi odustanemo što ćemo imati ponuditi potomstvu.

Neće biti suvišno ponoviti biblijske riječi koje je kao opomenu često znao izgovarati Vladika Antonije: „Udariće Pastira a Stado će se razbježati!“

Umjesto da te riječi imamo kao stalnu opomenu, one se u smjeru suprotnom od suštine koriste i dan danas, a imamo podosta onih koji su  to  spremni napraviti zarad „Judinih srebrnjaka“ pravdajući svoje postupke nečim što su imali prilike riješiti u vlastitoj kući, prije nego se  odluči služiti interesima, koji nijesu ni patriotski, a još manje crkveni, ni po Božjim ni po ljudskim zakonima.

Vladiko Antonije, mi smo  ipak tu  i nijesmo se razbježali, premda nas nerazumom pokušavaju zatrovati! Mi smo neugodni svjedoci vremena stradanja, potiranja, najrazličitijih vrsta pritisaka,  utamničenja, progona… Svjedoci smo i paklenih namjera koje je bilo teško prepoznati, a nude nam  se u vidu obećanja dobrobiti, pomirenja! Mi se nijesmo svađali ni sa kime! Dovoljno je vratiti se par mjeseci unazad, pa da vidimo da dojučerašnji prijatelji, rođaci, kumovi žive u nezboru! Valja se zapitati: „Čijom zaslugom?“ Božja Volja se ne da „prekrajati“ od strane ljudi, vječito gladnih političke moći, gladnih dominacije nad drugim ljudima! Duh naše Svete Crnogorske Pravoslavne Crkve nije građevina koja se nalazi uknjižena na nekoj katastarskoj parceli, i ne da se uzurpirati na bilo koji način, jer se nalazi onamo đe sotonističko Zlo nema pravo pristupa; ona je u srcima svih časnih Crnogoraca, onih koji su radi te svoje ljubavi spremni postradati, slijedeći Put našeg   gospoda i Spasa Isusa Hrista!

Pomolimo se za našu zaluđelu braću, da im Gospod prosvijetli razum i  probudi srca, kako bi i śeni naše počivše braće i sestara konačno našle svoj mir!

Sveti Petar Cetinjski Čudotvorac bi kazao: „Crnogorci, vi činite što znate, a ne znate što činite!“

Pomolimo se za braću i sestre, koji su se preselili u Vječnost, tamo đe ih je očinski prigrlio naš Arhipastir, Vladika Antonije, a Njemu uz poruku da nijesmo pogazili dati Zavjet, neka je vječna hvala i slava!